Ég er í sumarfríi
Í hröðum heimi er mikilvægt að loka tölvunni og njóta þess að fara í frí. Þegar þú ert í orlofi er fátt betra en að aftengjast, hvílast, njóta með fjölskyldunni, ferðast eða gera það sem hentar þér best til að hlaða batteríin.
Höfundur
Allt launafólk á rétt á að því að fara í frí. Orlofsréttur fólks er bæði tryggður með sérstökum lögum og kjarasamningum. Starfsfólk á mánaðarlaunum heldur launum sínum í orlofi.
Orlofsréttur snýst annars vegar um rétt til að taka sér leyfi frá störfum og hins vegar rétt til launagreiðslna á meðan orlofinu stendur.
Þú vinnur þér inn orlof á svokölluðu orlofsári, sem er ekki hefðbundið almanaksár, heldur tímabilið frá 1. maí – 30. apríl. Á þessu tímabili vinnur þú þér inn rétt til orlofs og orlofslauna á næsta orlofsári.
Orlofsréttur ríkisstarfsmanna er 30 dagar (240 stundir) miðað við fullt starf. Ávinnsla orlofs miðast við starfshlutfall og starfstíma. Tímabil sumarorlofs er frá 1. maí til 15. september og á starfsfólk rétt á að fá 15 daga samfellda á því tímabili. Starfsfólk fær 13,04% orlofsfé á yfirvinnu og álagsgreiðslur.
Veikist starfsmaður í orlofi telst sá tími sem hann er veikur ekki til orlofs. Mikilvægt er að tilkynna yfirmanni tafarlaust ef um veikindi eða slys í orlofi er að ræða. Í slíkum tilvikum er heimilt að flytja ótekið orlof til næsta árs.
Starfsfólk sem er í fæðingarorlofi nýtur réttinda til greiðslu sumarorlofs, persónu- og orlofsuppbótar.
Starfsfólk vinnur sér inn orlofsrétt í veikindaleyfi alveg eins og hann væri að störfum.
Orlofsréttur starfsfólks sveitarfélaga er 30 vinnudagar (eða 240 stundir) miðað við fullt starf. Ávinnsla orlofs miðast við starfshlutfall og starfstíma. Tímabil sumarorlofs er frá 1. Maí til 15. September og á starfsfólk rétt á að fá 15 daga samfellda á því tímabili. Starfsfólk fær 13,04% orlofsfé á yfirvinnu og álagsgreiðslur.
Veikist starfsmaður í orlofi telst sá tími sem hann er veikur ekki til orlofs. Mikilvægt er að tilkynna yfirmanni tafarlaust ef um veikindi eða slys í orlofi er að ræða. Í slíkum tilvikum er heimilt að flytja ótekið orlof til næsta árs.
Starfsfólk sem er í fæðingarorlofi nýtur réttinda til greiðslu sumarorlofs, persónu- og orlofsuppbótar.
Starfsfólk vinnur sér inn orlofsrétt í veikindaleyfi alveg eins og hann væri að störfum.
Lágmarksorlof er 24 virkir dagar miðað við fullt ársstarf og nema þá orlofslaun 10,17%. Ávinnsla orlofs miðast við orlofsárið sem er frá 1. maí til 30. apríl.
Starfsmaður sem unnið hefur 5 ár í sömu starfsgrein á rétt á orlofi í 25 virka daga og orlofslaunum sem nema 10,64%.
Starfsmaður sem unnið hefur 5 ár hjá sama atvinnurekanda á rétt á 27 virkum dögum og 11,59% orlofslaunum.
Starfsmaður sem unnið hefur 10 ár hjá sama atvinnurekanda á rétt á 30 virkum dögum og 13,04% orlofslaunum.
Starfsfólk á rétt á að minnsta kosti fjórum vikum (20 virka daga), á tímabilinu 2. maí til 15. september. Þau sem samkvæmt ósk atvinnurekanda fá ekki 20 orlofsdaga á sumarorlofstímabilinu og þurfa að taka orlof utan orlofstímabilsins eiga rétt á 25% álagi á það sem vantar á 20 dagana.