Skýr skilaboð Visku vöktu athygli á 1. maí
Fulltrúar Visku í kröfugöngu 1. maí vöktu verðskuldaða athygli með hnitmiðuðum kröfum og kröftugri þátttöku.
Höfundur
Félagsfólk í Visku var mætt til leiks í kröfugöngu og hátíðarhöld á baráttudegi launafólks 1. maí. Skilaboð Visku voru skýr, ávinningur háskólanáms er of lítill, greiðslubyrði námslána of íþyngjandi og ekki verður búið við kaupmáttarbruna háskólafólks til lengdar.
Viska tók þátt í baráttudegi launafólks 1. maí síðastliðinn. Viska tók til starfa um áramótin og því var þetta í fyrsta sinn sem félagið tekur þátt í kröfugöngunni á þessum merka degi. Skilaboð Visku vöktu mikla athygli eins og sjá mátti í viðtali við formann og framkvæmdastjóra félagsins í kvöldfréttum Stöðvar 2.
Helstu skilaboð Visku á 1. maí voru:
· Minnsti ávinningur af háskólamenntun í Evrópu er á Íslandi og hann er helmingi minni en á öðrum Norðurlöndum
· Námslán eru íþyngjandi afborganir út lífið
· Ungt fólk með meistaragráðu hefur enga kaupmáttaraukningu fengið á þessari öld
· Metum þekkingu að verðleikum
Eins og sjá má á myndunum fóru skilaboð Visku ekki framhjá neinum. Fleiri myndir frá 1. maí má síðan sjá á Fésbókarsíðu Visku.
