Fé­lags­st­arf Visku

Félagsfólk getur boðið sig fram til stjórnar Visku. Stjórn Visku er skipuð sjö félagsmönnum, formanni, sex aðalmönnum auk tveggja til vara. Formaður er kosinn sérstaklega á fjögurra ára fresti en stjórn er kosin til tveggja ára. Stjórn kýs sér varaformann og skiptir að öðru leyti með sér verkum.

Kosningar til trúnaðarstarfa innan félagsins eru rafrænar og skal opna fyrir þær minnst sjö dögum fyrir aðalfund. Til að stuðla að jafnri kynjaskiptingu í stjórn skal sá frambjóðandi sem flest atkvæði fær skipa fyrsta sæti í stjórn. Næsta sæti skipar sá frambjóðandi af öðru kyni sem flest atkvæði fékk o.s.frv. Þessi kynjaflétta skal halda áfram til röðunar varamanna. Niðurstöður kosninga eru kynntar á aðalfundi sem haldinn er á hverju ári fyrir lok apríl.

Næst verður gengið til kosninga í Visku vorið 2025 og skal þá kosið í öll embætti stjórnar. Kosið er til formanns til fjögurra ára, um þrjá stjórnarmenn til tveggja ára, þrjá stjórnarmenn til eins árs og tvo varamenn til eins árs.

Nánar er fjallað um kosningar til embætta í 10. grein félagssamþykkta Visku.

Kjaradeildir Visku sjá um kjara- og fræðslumál eftir fagsviðum og starfsvettvangi. Þær gæta hagsmuna síns félagsfólks og geta samið fyrir þeirra hönd.

Félagsfólki er heimilt að leggja fyrir aðalfund að stofnuð verði kjaradeild tengd fagsviði, starfsvettvangi eða landsvæði. Formaður kjaradeildar og tveir til fjórir aðalmenn í stjórn kjaradeildar eru kosnir til eins árs í rafrænum kosningum og eru niðurstöður kynntar á aðalfundi Visku.

Innan Visku er starfandi ein kjaradeild, Kjaradeild bókasafns- og upplýsingafræðinga.

Faghópar Visku vinna að því að styrkja stöðu sinnar fagstéttar, efla tengslanet og stuðla að aukinni þekkingu og framþróun hver á sínu sérsviði.

Félagsfólki er heimilt að leggja fyrir stjórn Visku að stofnaður verði faghópur til að styrkja stöðu tiltekinna fagstétta sem eru innan félagsins.

Innan Visku starfar fulltrúaráð sem er skipað formanni félagsins og fulltrúum starfandi kjaradeilda og faghópa innan félagsins. Landssamband íslenskra stúdenta (LÍS) tilnefnir árlega fulltrúa í fulltrúaráð Visku.

Fulltrúaráð er stjórn félagsins til ráðgjafar í stefnumótandi málum og kemur saman minnst einu sinni á ári. Formaður félagsins er jafnframt formaður fulltrúaráðs.

Trúnaðarmaður er félagi í stéttarfélagi sem hefur verið tilnefndur af starfsmönnum eða félaginu sjálfu sem fulltrúi þess á vinnustað.

Trúnaðarmenn Visku eru virkir á fjölda vinnustaða út um land allt. Hafðu samband við skrifstofu félagsins til að fá upplýsingar hvort trúnaðarmaður sé starfandi á þínum vinnustað.

Vantar trúnaðarmann á þínum vinnustað? Hægt er að fá frekar upplýsingar og aðstoð við kosningu trúnaðarmanna hjá Visku með því að senda fyrirspurn á skrifstofu félagsins.

Viska heldur reglulega námskeið fyrir félagsfólk, auk þess sem félagsfólk hefur aðgang að fjölbreyttri endurmenntun utan félagsins.

Allt félagsfólk Visku hefur aðgang að rafrænum MasterClass námskeiðum Akademias. Smellið hér til að skoða námsúrvalið og skrá ykkur á námskeið.

Félagsfólk Visku sem er einnig í Starfsþróunarsetri háskólamanna og starfar á opinbera markaðnum geta sótt námskeið sem skipulögð eru af Starfsmennt fræðslusetri. Fjölbreytt námskeið eru í boði hjá Starfsmennt sem félagsfólk er hvatt til að skoða vel. Hér er hægt að sjá yfirlit yfir næstu námskeið. Nánari leiðbeiningar til einstaklinga um hvernig skuli haga skráningu til að virkja rétt sinn er að finna á síðunni greiðsluþátttaka hjá Starfsmennt.

Viska er virk á samfélagsmiðlum. Fylgdu okkur á Facebook og taktu þátt í samfélagsumræðunni.